Lleihau effaith amgylcheddol ein gwaith

Bambŵ ar daith 

Roedd defnyddio bambŵ, sef math o wellt sy'n gwbl gynaliadwy, yn lle offer syrcas traddodiadol yn ffordd o greu sioe gwbl adnewyddadwy a chynaliadwy yng nghyd-destun yr argyfwng hinsawdd. Gan mai ychydig iawn o seilwaith roedd arnom ei angen, bod y cwmni teithiol yn gymharol fach (9 o bobl), a'n bod yn defnyddio system sain a ariannwyd gan Brosiect Gwyrdd Viridor, gyda batris ailwefradwy yn defnyddio ynni'r haul, roedd modd i ni fynd â'r sioe ar daith gynaliadwy gyda'r ôl troed amgylcheddol lleiaf posibl. Pŵerwyd 51 o berfformiadau gan ddefnyddio dim ond ein system batris solar – dim trydan o'r grid o gwbl. Mae hyn yn cynnwys perfformiadau lle defnyddiwd system sain yr Ŵyl, ond wedi’i phlygio i’n batris ni.

Prosiect Paneli Solar 

Ers 2012, bu canolfan NoFit mewn hen gapel yn Adamsdown, Caerdydd, a gafodd ei ailwampio a'i droi'n hyb cymunedol. Ar ôl sicrhau Grant Cyfalaf gan Gyngor Celfyddydau Cymru, Grant Adeiladau Cymunedol gan Gyngor Caerdydd, a chyllid o Raglen Cyfleusterau Cymunedol Llywodraeth Cymru & Cynllun Effeithlonrwydd Ynni CGGC, gosodir paneli solar ar do ein cartref, Four Elms yn 2025. Prif nod hyn yw sicrhau lleihad sylweddol yn ein hallyriadau carbon a symud at gynhyrchu trydan glân, adnewyddadwy a chost-effeithiol heb gynhyrchion gwastraff risg uchel.

Amcangyfrifir y bydd gosod paneli solar yn golygu ein bod yn defnyddio tua 51% yn llai o ynni yn yr adeilad, gan allyrru 3970kg yn llai CO2 mewn blwyddyn. Mae hynny'n cyfateb i fwy na thair taith awyren ddwyffordd dros yr Iwerydd mewn blwyddyn. Bydd hyn yn ein symud yn nes at gyflawni ein nod o fod yn garbon niwtral o fewn y 10 mlynedd nesaf.

Beth nesaf?

Mae ein hymrwymiad i leihau ein heffaith ar yr amgylchedd yn glir. Rydym wedi datblygu cynllun cadarn ar gyfer y pedair blynedd nesaf gan ddefnyddio dull ag iddo bedair elfen. Byddwn yn cadw at ein harferion da presennol ac yn canolbwyntio ar dri chynllun: newid i ddefnyddio biodiesel i bŵeru safleoedd, gwneud gwaith ôl-osod yn Four Elms, a chefnogi Zukani Action Zambia. Gyda'i gilydd, bydd y tri chynllun hyn yn arwain at ostyngiad o 71 tunnell y flwyddyn yn ein hallyriadau CO2 trwy gyfuniad o leihau a gwrthbwyso.  Mae hyn yn cyfateb i 68 taith awyren ddwyffordd dros yr Iwerydd (Llundain i Efrog Newydd) neu blannu tua 2500 o goed – 4.5 erw o goetir. 

Yn ogystal, bydd ein Cynllun Gweithredu Amgylcheddol yn parhau i fonitro ein gwaith gweinyddu a rheoli, ymgysylltiad staff, mynd ar daith a gwaith cynhyrchu, trafnidiaeth, teithio a cherbydau, cyflenwyr a chontractwyr, ac ymgyrchoedd ac ardystio.